ഊഞ്ഞാലില്‍ ഒരു പെണ്‍കുട്ടി

മഞ്ഞക്കുറിമുണ്ടു ചാര്‍ത്തിയിട്ടും
മഞ്ഞള്‍പ്പവന്‍ മാല കോര്‍ത്തതിട്ടും
പൊന്നരഞ്ഞാണം തെളിയുമാറും
ഓടിക്കിതച്ചവള്‍ വന്നിടുന്നു

രാമായണം കഥ കാപ്പുമിട്ടും
വെള്ളിക്കൊലുസ്‌ കിലുക്കിയിട്ടും
ഊഞ്ഞാല്‍പ്പലകമേലേറി നിന്നും
മഞ്ഞപ്പറവപോലാടീടുന്നു

പിന്നിലായ്‌ പാറും ചുരുള്‍ മുടിയും
പിന്നിയിട്ടുള്ള കുറുമൊഴിയും
ചന്ദനച്ചാര്‍ത്തിന്‍ മണവുമായി
വന്നിടുന്നാരിവള്‍ കിന്നരിയോ!

മോഹവലയ മതിഭ്രമമോയിത്‌
ആരിവളാരിവള്‍ മോഹനാംഗി!!!

ബാലതപസ്വിനി പാര്‍വ്വതീദേവിയോ ?
വൃന്ദാവനിയിലെ രാധികയോ ?
ബാവുള്‍ മനോഹരി പാര്‍വ്വതിക്കുട്ടിയോ?
വാസുദേവാത്മജ ജാനകിയോ ?
പത്മനാഭന്റെ പ്രകാശിനി ഗൗരിയോ ?
പത്മവിലോചന സീതതാനോ?

മോഹവലയ മതിഭ്രമമോയിത്‌
ആരിവളാരിവള്‍ മോഹനാംഗി!!!

കെട്ടുകല്യാണം ചമയിച്ചുനിര്‍ത്തിയ
കുട്ടിക്കിശോരികള്‍ കന്യകമാര്‍
മീരയോ ലേഖയോ ചിന്നമ്മുമാര്‍കളോ
കാലമാം കന്യക തന്നെയെന്നോ?.

X X X X

നാലുകെട്ടിന്റെ നടതുറന്നീടുന്നു
മഞ്ചലിലേറി മറഞ്ഞീടുന്നു
ഒന്നു പുണരുവാന്‍ കൈനീട്ടി നില്‍ക്കവേ
ഓടി മറഞ്ഞവള്‍ പോയീടുന്നു.

കൈവിട്ടുപോയൊരാക്കുട്ടിമോഹങ്ങളും
കുട്ടിയും ദൂരെ ചിരിച്ചുനില്‍പ്പൂ
മാടിവിളിച്ചു കൊതിപ്പിച്ചുകൊണ്ടവള്‍
മായച്ചിരി തൂകി പോയിടുന്നു...

(ബാവുള്‍.....ക്കുട്ടിയോ- ബാവുള്‍ ഗായിക പാര്‍വ്വതി
വാസു.....ജാനകിയോ-എം.ടി.വാസുദേവന്‍നായരുടെ കഥാപാത്രം
പത്മ......ഗൗരിയോ-ടി.പത്മനാഭന്റെ പ്രകാശം പരത്തുന്ന പെണ്‍കുട്ടി
മീരയോ........മാര്‍കളോ- കൊച്ചുമക്കള്‍)